世博，讓我們的生活更S·B
2010-05-23 Permalink / 3 comments
由今個月頭開始，陸陸續續就有朋友Q我問我關於世博嘅嘢，勢估唔到原來世博嘅吸引力真係咁大...不過問題係，如果唔系因為今年由天朝舉行，恐怕我哋哩班愚民哩一世都唔知道，原來世界上有樣嘢叫做"世博"...好記得當年上海贏得世博會舉辦權嘅時候，我以為世博會係請其他國家啲領導過嚟開會，我仲係度諗：啲撈西係咪short架？！人哋過嚟開會咋嘛，佢哋咁西high做乜七啊？！...家下諗起，覺得當時嘅自己實在太過孤陋寡聞啦...係我嘅錯？定係阿爺嘅錯呢？
雖然後來係天朝政府嘅宣傳下，我對世博會有咗比較深入嘅了解同認識，但係基本上冇刺激到我嘅high點...正如韓寒話齋，喺哩個信息氾濫嘅年代，只要你識得上網，世界嘅每一個角落都可以盡收妳嘅眼底...世博對於國民嘅宣傳語係"不出國門看世界"，但係互聯網仲勁，可以"不出家門看世界"...不過再諗深一層，我哋天朝只有一個全世界最大嘅局域網，係冇互聯網哩家嘢架，照咁睇嚟都係世博勁啲，問你死未...
不過，唔好意思，令妳哋失望了，本人係去咗世博嘅...4月底嘅時候，伍老太好興奮咁打電話畀我話我知，農行送咗兩張飛畀佢，於是佢就快遞咗嚟上海畀我，嗌我趁得閒少人就去世博行翻幾轉...既然有免費票係手，不去白不去...可惜去咗之後，不但冇令我改變原來對世博嘅睇法，而且仲加深我對世博嘅不屑...可以好負責任咁講句，世博真係正如其拼音縮寫一般：S·B！...具體點S·B就唔講啦，我知我就算講得再具體再詳細，都阻止唔到妳哋哩班熱血青年赴死（sorry，應該係赴會）嘅決心，自己做好O嘴嘅心理準備啦...
當然，當中依然有令我覺得滿意嘅地方...如果真係要去世博，本人強烈建議妳去睇浦西展區嘅城市案例館，比浦東展區嘅大部份國家館都要有趣...特別係澳門案例館--德成大按，里面有個迷你金庸圖書館...未來館都OK，起碼係里面我影咗一張比較滿意嘅相，就係本文開頭嘅果張圖片...離開園區嘅時候，我本來想鼓起只有睇黃子華棟篤笑嘅時候先會有嘅勇氣，向檢票嘅工作人員大嗌一句"回水"，但係諗真啲，自己張飛都係免費嘅，算啦，何苦要為難啲廉價勞工呢，人哋都係搵食嗟...（犯法啊？）
睇到哩度，可能有人會問："咦？妳唔係有兩張飛架咩？！乜凈係去一日咁嘥啊？"...小朋友，睇嚟要帶妳去幼兒園等啲姨姨教下妳數數至得...
